Þátttakendur taka þátt í samtölum um kynbundið ofbeldi, skiptast á þekkingu, reynslu og aðferðum til að verjast gegn ofbeldi og áreiti og fá kennslu í sálrænni, tilfinningalegri, munnlegri og líkamlegri sjálfsvörn. Þátttakendur læra hvernig á að bera kennsl á það þegar farið er yfir mörk þeirra, hvort sem um er að ræða lúmska eða augljósa árás, og er það gert í gegnum leiki og áhrifaríkar æfingar. Þátttakendur læra einnig um mismunandi tegundir ofbeldis og mismunandi strategíur til að bregðast við þeim. Farið er yfir hvað er gott að hafa í huga þegar setja á skýr mörk, bæði með líkamstjáningu og munnlega. Þátttakendur fá kennslu í líkamlegri sjálfsvörn þar sem kenndar eru aðgengilegar varnaraðferðir gegn nokkrum af algengustu líkamsárásunum.

Á þessu námskeiði geta þátttakendur snert örlítið á fjórum þáttum femínískrar sjálfsvarnar, þ.e.a.s.  tilfinningalegri, sálrænni, munnlegri og líkamlegri sjálfsvörn. Þetta námskeið er tilvalið fyrir þau sem komast ekki á helgarnámskeið eða vilja sjá hvað FSV snýst um áður en heil helgi er tekin frá.

Munnleg sjálfsvörn getur tekið á sig margar myndir og hægt er að beita ýmsum aðferðum. Á þessu námskeiði læra þátttakendur í gegnum leiki og æfingar hvernig á að þekkja mismunandi tegundir árása og velta fyrir sér mismunandi munnlegum varnaraðferðum. Það er mjög óþægilegt að verða fyrir árás (hvort sem það felur í sér óviðeigandi athugasemd, ítrekaðar augngotur, niðurlægingu, o.sfrv…) og algengt er að missa stjórn á viðbrögðum sínum (t.d. Með því að frjósa eða gráta). Áhersla er lögð á að læra leiðir til að hafa stjórn á tilfinningum sínum á meðan óþægilegar eða hættulegar aðstæður eiga sér stað og læra að benda þeim í farveg sem nýtist í sjálfsvörn. Unnið er í gegnum hlutverkaleiki og ýmsar praktískar æfingar til að þátttakendur fái tækifæri til að æfa þá munnlegu tækni sem kennd er í sem raunverulegustu aðstæðum.

Kynbundið ofbeldi er knúið áfram af kvenfyrirlitningu og feðraveldi. Það á einnig við um ofbeldi gegn hinsegin fólki. Ofbeldi gegn hinsegin fólki er ein birtingarmynd kynbundins ofbeldis. Oft hefur ofbeldið sem beinist gegn hinsegin fólki sérstaka eiginleika sem er hætt við að gleymist að fjalla um og skoða í samhengi sem eru hugsuð fyrst og fremst fyrir sís- og gagnkynja fólk. Þess vegna er mikilvægt að útvega rými sérstaklega fyrir hinsegin fólk. 

Í þessu námskeiði fá þátttakendur tækifæri til að ræða saman um ofbeldi gegn hinsegin fólki (bæði innan hinsegin samfélagsins og utan þess), deila þekkingu og aðferðum til að verja sig gegn ofbeldi og áreitni. Þátttakendur læra fjölbreyttar sjálfsvarnaraðferðir sem fela í sér  sálræna,  tilfinningalega, munnlega og líkamlega sjálfsvörn. Allt hinsegin fólk er velkomið á þetta námskeið.

Slagtog býður upp á námskeið fyrir stelpur og trans börn í mismunandi aldurshópum (8-10 ára, 10-12 ára, 12-14 ára, 15-17 ára). Námskeiðin eru þróuð af þjálfurum frá belgísku félagasamtökunum Garance, sem hafa unnið með börnum í FSV í mörg ár. Innihald hvers námskeiðs er aðlagað að félagslegu, sálrænu, líkamlegu og vitsmunalegu þroskastigi hvers aldurshóps. Kennt er í gegnum fjörugar og skemmtilegar æfingar og leiki sem gera börnum kleift að tala um og velta fyrir sér birtingarmyndum ofbeldis og þeim tilifinningum sem koma upp þegar einhver fer yfir mörk hjá okkur. Kennslan miðar að því að ræða um efnið á valdeflandi hátt (en ekki á ógnvekjandi, kvíðvaldandi hátt) í öruggu umhverfi. 

Á námskeiðunum er lögð sérstök áhersla á réttindi barna til að upplifa sig örugg, sterk og frjáls og mikilvægi þess að standa saman. Slík meðvitund getur auðveldað börnunum að tjá sig ef brotið er á þeim eða farið er yfir mörk þeirra.